စမတ်ဖုန်းတစ်လုံးအသုံးပြုပြီး ကွန်ပြူတာကို အဝေးကနေ ဘယ်လိုလှမ်းထိန်းချုပ်မလဲ

အလုပ်ကိစ္စနဲ့ အရေးတကြီးအပြင်ထွက်လာတုန်း၊ အိမ်ကကွန်ပြူတာထဲမှာ ဖိုင်တစ်ခုခုကျန်ခဲ့တယ်ဆိုရင် ဘယ်လိုလုပ်မလဲ။ ပြန်ယူဖို့ကလည်း အဆင်မပြေ၊ အိမ်ကလူတစ်ယောက်ယောက်ကို မေးလ်လှမ်းပို့ခိုင်းရအောင်လည်း ဘယ်သူကမှ ကွန်ပြူတာ၊အင်တာနက် မသုံးတတ်ဆို ဘယ်လိုလုပ်မလဲ။
လွယ်ပါတယ်။ သင့်စမတ်ဖုန်းနဲ့ အိမ်က ကွန်ပြူတာကို လှမ်းထိန်းချုပ်ပြီး၊ ကျန်ခဲ့တဲ့ဖိုင်တွေကို မေးလဲ ပို့ထားနိုင်ပါတယ်။
ဒီနည်းလမ်းက အရမ်းလွယ်ကူပြီး၊ စမတ်ဖုန်းတစ်လုံး၊ သင်ထိန်းချုပ်မယ့် ကွန်ပြူတာ၊ အင်တာနက်လိုင်းနဲ့
TeamViewer အက်ပလီကေးရှင်းတို့ပဲ လိုအပ်ပါတယ်။ ဒီ app ဟာ Android ကော iOS ကော၊ Mac OS ကော Windows မှာပါ အခမဲ့အသုံးပြုနိုင်ပါတယ်။ ကဲ၊ ဘယ်လိုလုပ်မလဲ လေ့လာကြည့်လိုက်ရအောင်။

(၁) ဖုန်းနဲ့ ကွန်ပြူတာကို ချိတ်ဆက်မယ်

• ပထမဦးဆုံး ဖုန်းကော ကွန်ပြူတာကို အင်တာနက်ချိတ်ဆက်ထားပါ။
• ပြီးနောက် TeamViewer အက်ပလီကေးရှင်းကို ဖုန်းနဲ့ PC အတွက်ဒေါင်းလုဒ်ဆွဲပေးရပါမယ်။
• Android အတွက် Teamviewer app ကို Google Play Store ကနေ ဒေါင်းလုဒ်ဆွဲနိုင်ပြီး၊ PC အတွက် ဒီမှာ ဆွဲပါ။
• ဖုန်းမှာကော ကိုယ်ထိန်းချုပ်မယ့်ကွန်ပြူတာမှာပါ ဒီ app ကို သွင်းပေးပါ။
• PC မှာ သွင်းထားတဲ့ TeamViewer က သင့်ကို ID နံပါတ်တစ်ခုနဲ့ လှို့ဝှက်ကုဒ် password တစ်ခု ပေးပါလိမ့်မယ်။

• အဆိုပါ ID နံပါတ်နဲ့ password ကို ဖုန်းမှာသွင်းထားတဲ့ TeamViewer app မှာ ရိုက်ထည့်ပေးပါ။

• ဒီအဆင့်တွေပြီးရင်၊ ချိတ်ဆက်မှုအောင်မြင်မှုဖြစ်ကြောင်း ကွန်ပြူတာမှာ notification တက်လာပါလိမ့်မယ်။

• အခုအချိန်ကစပြီးတော့ သင့်ကွန်ပြူတာကို ကိုယ်ဘယ်ပဲရောက်နေနေ၊ ဖုန်းကနေ အလွယ်တကူ ထိန်းချုပ်နိုင်ပြီဖြစ်ပါတယ်။
• ဖုန်းမှာ ကွန်ပြူတာ interface ကြည့်ကောင်းအောင်လို့ ဖုန်းကို Landscape mode နဲ့ သုံးတာက ပိုကောင်းပါလိမ့်မယ်။

(၂) TeamViewer app က ဘာတွေလုပ်နိုင်လဲ

ချိတ်ဆက်မှုပြီးသွားတဲ့အခါ၊ ကျွန်တော်တို့ စမတ်ဖုန်းကနေ ကွန်ပြူတာကို ဘယ်လိုထိန်းချုပ်နိုင်လဲ ကြည့်ကြည့်ရအောင်

• ကွန်ပြူတာမှာ မောက်စ်သုံးချင်တယ်ဆိုရင် ဖုန်းမှာသွင်းထားတဲ့ TeamViewer app ကနေ mouse pointer ကို လက်နဲ့ဆွဲပြီး သုံးနိုင်ပါတယ်။

• ကွန်ပြူတာမှာ စာရိုက်ချင်တယ်ဆိုရင် (ဒါမှမဟုတ်) right click ခေါ်ချင်တယ်ဆိုရင်၊ app စခရင် အောက်မှာပါတဲ့ ခလုတ်လေးတွေကနေ အသုံးပြုနိုင်ပါတယ်။

• ဖုန်းနဲ့ ကွန်ပြူတာအကြား ချိ်တ်ဆက်မှုမြန်နှုန်းကတော့ အင်တာနက်လိုင်းအပေါ်မှာ မူတည်ပါတယ်။ တကယ်လို့ အင်တာနက်လိုင်းမကောင်းဘူးဆိုရင်တော့ ကိုယ်က ဖုန်းမှာ ကလစ်နှိပ်လိုက်ပေမယ့်၊ ကွန်ပြူတာမှာ ကလစ်မပေါ်သေးဘဲ၊ အနည်းငယ် ကြန့်ကြာနေမှာ ဖြစ်ပါတယ်။ လူကိုယ်တိုင် ကွန်ပြူတာရှေ့မှာ ထိုင်သုံးနေရသလောက် မကောင်းပေမယ့်၊ ဒီ app ဟာ တော်တော်အသုံးဝင်တဲ့ app ဆိုတာ ငြင်းမရပါဘူး။

Android ဖုန်းကို အသုံးပြုပြီး၊ အဝေးတစ်နေရာမှာရှိတဲ့ ကွန်ပြူတာကို လှမ်းထိန်းချုပ်နိုင်တယ်ဆိုတာက တော်တော်အသုံးဝင်တဲ့ နည်းပညာတစ်ခုဖြစ်ပါတယ်။ ဥပမာ ကိုယ့်သူငယ်ချင်းတစ်ယောက်ယောက်က “ငါ့ ကွန်ပြူတာ ဘာဖြစ်နေလဲမသိလို့ ကြည့်ပေးပါဦးကွာ” လို့ လှမ်းအကူအညီတောင်းရင်တောင်၊ အိမ်ကနေ ထစရာမလိုဘဲ၊ သူ့ကွန်ပြူတာကို လှမ်းကြည့်ပေးနိုင်ပါတယ်။
အားလုံးပဲ နည်းပညာကို အကျိုးရှိကောင်းမွန်စွာ အသုံးချနိုင်ပါစေ။